ҰЛТТЫҚ ҚҰРЫЛТАЙ: ҚОҒАМДЫҚ КЕЛІСІМ, ЖҮЙЕЛІ РЕФОРМАЛАР ЖӘНЕ ӘДІЛЕТТІ ҚАЗАҚСТАНДЫ ҚАЛЫПТАСТЫРУ

Ұлттық құрылтай — Қазақстан Республикасындағы қоғамдық-саяси дамудың жаңа моделін айқындайтын, мемлекет пен азаматтық қоғам арасындағы өзара сенімге негізделген ашық диалог алаңы. Ол ұлттық мүдделерді үйлестіруді, қоғамдағы өзекті мәселелерді талқылауды және оларды нақты шешімдерге айналдыруды көздейтін маңызды институт ретінде қалыптасты.

Құрылтай отырыстары барысында ел дамуының стратегиялық бағыттары, әлеуметтік әділеттілік, ұлттық бірегейлік, заң үстемдігі, мәдени мұраны сақтау, адами капиталды дамыту және өңірлердің теңгерімді дамуы сияқты басым мәселелер жан-жақты қарастырылады. Қабылданған ұсыныстар Мемлекет басшысының бастамаларымен ұштасып, нақты заңнамалық және институционалдық тетіктер арқылы іске асырылуда.

Төрт Ұлттық құрылтайдың қорытындысы бойынша 26 заң қабылданып, бірқатар Президент жарлықтары, тұжырымдамалар, кешенді жоспарлар мен ұлттық бағдарламалар бекітілді. Бұл шешімдер қоғамдық қауіпсіздікті күшейтуге, балалар мен әйелдердің құқықтарын қорғауға, еңбек адамының мәртебесін арттыруға, ұлттық мәдениет пен рухани құндылықтарды сақтауға, ғылым мен білімді дамытуға, сондай-ақ креативті және инновациялық экономиканы қолдауға бағытталған.

Ұлттық құрылтай аясында «Тәуелсіздік пен отаншылдық», «Әділетті Қазақстан – Адал азамат», «Заң мен тәртіп», «Еңбек адамы», «Кітап оқитын ұлт», «Біз әртүрліміз, бірақ бәріміз теңбіз» сынды іргелі құндылықтар жүйелі түрде іске асырылып келеді. Бұл бастамалар қоғамда жауапкершілік мәдениетін қалыптастыруға, азаматтардың құқықтық санасын арттыруға және әлеуметтік бірлікті нығайтуға ықпал етуде.

Қазіргі таңда елдің әлеуметтік, гуманитарлық және мәдени дамуын одан әрі жетілдіруге бағытталған 10 жаңа заң жобасы әзірлену үстінде. Ұлттық құрылтай қызметі «Әділетті Қазақстан» тұжырымдамасын кезең-кезеңімен жүзеге асыруға, азаматтардың өмір сапасын арттыруға және тұрақты дамуға негізделген мемлекетті қалыптастыруға бағытталған.