АВИАЦИЯЛЫҚ БІЛІМ БЕРУ САЛАСЫНДАҒЫ ХАЛЫҚАРАЛЫҚ СЕРІКТЕСТІКТІ ДАМЫТУ: АЗАМАТТЫҚ АВИАЦИЯ АКАДЕМИЯСЫ ДЕЛЕГАЦИЯСЫНЫҢ ТҮРКИЯҒА САПАРЫ
Азаматтық авиация академиясының делегациясы авиациялық білім беру және мамандар даярлау саласындағы халықаралық ынтымақтастықты дамытуға бағытталған жұмыс сапарымен Түркия Республикасына барды.
Сапар аясындағы басты іс-шара Адана қаласында өтті — Ғылым және технологиялар университетінің басшылығымен ресми кездесу ұйымдастырылды. Келіссөздер авиациялық және инженерлік ғылымдар саласында ұзақ мерзімді серіктестік қалыптастыруға, бірлескен білім беру бағдарламаларын іске қосуға, академиялық және студенттік ұтқырлықты дамытуға, сондай-ақ халықаралық ғылыми-зерттеу және қолданбалы жобаларға қатысу мәселелеріне арналды.
Кездесу қорытындысы бойынша Азаматтық авиация академиясы мен Түркияның жетекші технологиялық университеттерінің бірі арасындағы стратегиялық ынтымақтастықтың институционалдық негізін айқындайтын Өзара түсіністік туралы меморандумға қол қойылды.
Одан әрі Анталия қаласында делегация Aksu Uçak Bakım Teknolojisi Mesleki ve Teknik Anadolu Lisesi оқу орнына барды. Бұл оқу орны әуе кемелеріне техникалық қызмет көрсету саласындағы мамандарды даярлаудың заманауи әрі тиімді үлгісі болып табылады, EASA Part-66/147 еуропалық стандарттарына сәйкес келеді және Түркияның азаматтық авиация кәсіпорындарымен тығыз өзара іс-қимылда практикалық даярлыққа бағытталған.
Сапар барысында білім алушыларда оқу үдерісінің ерте кезеңінен бастап қолданбалы құзыреттерді қалыптастыруға мүмкіндік беретін оқу және материалдық-техникалық база жан-жақты зерделенді.
Сондай-ақ Испарта қаласында орналасқан ERAH Aviation Academy басшылығымен жұмыс кездесуі өтті. Кездесу барысында ұшқыштарды практикалық даярлау мәселелері, авиациялық персоналды академиялық және кәсіби оқыту тәжірибесі, сондай-ақ стратегиялық өзара іс-қимылдың перспективалары талқыланды.
Жұмыс сапары Азаматтық авиация академиясының халықаралық ынтымақтастығын кеңейту жолындағы маңызды қадам болып, оның халықаралық деңгейдегі позициясын нығайтуға ықпал етті.