Азаматтық авиация академиясының студенттері мен оқытушылары ERASMUS бағдарламасы аясында Түркияның жетекші университетінде білім ала алады

Азаматтық авиация академиясының ректоры Бекен Сейдахметов жұмыс сапары аясында Түркияның Эскишехир техникалық университетіне (ESTÜ) барды. Кездесу барысында тараптар ERASMUS бағдарламасы бойынша ынтымақтастық туралы келісімге қол қойды.

ERASMUS бағдарламасы үздік студенттер мен оқытушыларды шетелде оқытуға бағытталған. Бағдарлама ғылыммен айналысатын, шет тілін меңгерген және жоғары GPA көрсеткішіне ие үміткерлерді қамтиды. Эскишехир техникалық университеті студенттерді 1 семестрге, ал оқытушыларды 5 күнге дейінгі тағылымдамадан өтуге қабылдауға дайын.

Келісімге сәйкес, грантқа үміткер студенттер мен оқытушылар халықаралық бөлімге тиісті құжаттарды тапсырып, іріктеуден өтуі қажет.

Айта кету керек, Эскишехир техникалық университетінің серіктес ретінде таңдалуы кездейсоқ емес. Хасан Полаткан атындағы әуежай университеттің аэронавтика және астрономия факультеті студенттеріне арналған оқу-тәжірибелік база болып табылады. Студенттер тағылымдамадан өтіп, әуежайдың нақты жағдайында практикалық тәжірибе ала алады. Бұл академия студенттеріне шетелде оқу кезінде авиациялық процестерді тәжірибе жүзінде игеруге мүмкіндік береді: ұшақтарға қызмет көрсету, ұшу басқару, қауіпсіздікті қамтамасыз ету және жолаушылармен жұмыс істеу.